مرآة الغرب

من روائع محمد الماغوط ......

-دكتور بدي تستأصلي كرامتي

طلع الدكتور بالمريض باستغراب

_كرامتك!!؟

- إيه كرامتي .. مو أنت دكتور جراح و أشطر واحد بالبلد بمعالجة الأورام الخبيثة ؟

- إيه بس...

- دكتور .. صدقني ما في أوسخ و أخبث من الكرامة .. و أنا كرامتي كتير عالية

- طيب احكيلي شو عم تحس؟ ..

- مشكلتي إني عم حس .. ما عاد بدي حس .

جوا البلد الكرامة مؤلمة دكتور

أنا مهندس و انخربت عيشتي بالحرب ،

وكرامتي ما عم تخليني مد إيدي لحدا مشان طعمي عيلتي

كرامتي ما عم تخليني أشتغل حمّال

بيتي راح ، و كرامتي ماعم تسمح لي أنزح لعند حدا و صفيت بالشارع

كرامتي ما عم تسمحلي أقبل مساعدات

وقفت ساعة عالدور لعبّي تنكة مازوت مبارح ،

إجا واحد............  ((الله أكبر عليه وعلى اللي داعمه)) وقف قدامي بلا دور و عبا عشر تنكات

كرامتي صارت تنخزني

صرخت و عيطت

أكلتا مسبات و كفوف و كرامتي صارت بالأرض و لهلق عم أرجف من هالقصة

- العمى كرامتك كتير متضخمة يا إبني ، بجوز تكون ملتهبة ، بس هاي ظروف البلد .. جرب تسافر..

- انا هيك قلت . شلت حالي و سافرت

الكرامة برا زعجتني أكتر ..

هونيك الكل عم يذلني .. و تعاملت أسوأ معاملة

جيت أشتغل بشهادتي .. ما حدا شغلني .. ما بشغلونا ..نحن

رفقاتي اللي معي صارو يلفوا سندويش و يقبضوا ٥٠٠ دولار بالشهر

بس أنا .. كرامتي اللعينة ما سمحتلي دكتور ... أنا دارس و تعبان ع حالي ، و ما خرج وقف ورا سيخ الشاورما

بس ولادي جاعوا

و أنا تعبت

خلصني الله يوفقك

- طيب ماشي متل ما بدك .. بس لازم تعرف .. إذا كرامتك راحت .. كتير صعب ترجع

- إن شاء الله عمرا ما ترجع

- ماشي .. شلاح و تفضل ع غرفة العمليات لنشوف

...................................

- كيف حاسس حالك

- ما بعرف .. ما عم حس بشي

- ممم طيب هلق رح أعمل كام تجربة لنتأكد من النتيجة

رفع الدكتور إيده و سلخو كف

- حسيت بشي يا كر؟

- لا

شال الدكتور كاسة مي و شلفا بوشو

- هلق ؟

- أبداً أبداً.

- كويس .. طيب هلق رح فضّي سلّة الزبالة ع راسك .. حسيت بشي ؟

- ولا شي

- كتير منيح .. عمليتك ناجحة .. مبروك .. صرت هلق مواطن طبيعي بكرامة معدومة و مؤهل تماماً للعيش بهالبلد

- دكتور .. دموعي ... دموعي عم ينزلو .. ليش عم أبكي انا ؟

- أنت عم تبكي من القهر يا إبني ..

حتى لو كرامتك راحت ، و حتى لو تعودت عالذل .. القهر جواتك مستحيل يروح ..

هلق ممكن تشتغل شو ما كان

رح تطنش الهندسة و تقبل تلف سندويش

ممكن تاكل كفوف و رفس و سب

رح توقف عالدور متل غيرك ، و مين ما أخذلك دورك ما رح تتأثر

صرت بتقدر تشوف ولادك بالشارع عم يشحدوا

و مرتك عم تشطف بيوت الغرب

رح تعيش بدون كبرياء .. بدون عزة 8نف س ..

بس رح تبكي

رح تظل مقهور

و مستحيل تنسى

يلي عرف طعمة الكرامة بيوم من الأيام .. بعيش كل عمره مقهور ع كرامته يلي راحت